|
Dood Culus ayaa
waxay ka taagan tahay in Xubnaha Golaha Deegaanka G/Banaadir
lagu qeybsado 4.5 oo ay Dowladda KMG ku dhisantahay.
(Muqdisho, Sept
11,
2008 Ceegaag Online)
Iyadoo
dhawaan la magacaabay Guddi Maamula Gobolka Banaadir iyo
diyaarinta doorashooyinka Golaha degaanka Maamulka loo dhisi
doono Gobolka ayaa waxaa soo baxaya warar sheegaya in qaab
dhismeedka Gobolka uu noqon doono 4.5 oo ah qaabka ay ku
dhisan tahay Dowladda Federaalka Soomaaliya.
Guddoomiyaha guddiga KMG ee dhawaan loo magacaabay gobolka
Banadir, Ibraahim Sh. Muxiyadiin, ayaa ka gaabsaday kaalinta
uu hab-qaybsiga 4.5 ku yeelanayo maamulka cusub ee gobolka
Banaadir.
Ibraahim
Sheekh Muxiyadiin ayaa sheegay in guddiga dhawaan lasoo
dhisay ee ka kooban 12-ka xubnood, ay goor dhow ka tashan
doonaan kaalinta uu hab-qaybsiga 4.5 ku yeelanayo Gobolka
Banadir, iyadoo uu jiro cadaadis kaga imaanayo Beelaha
degan Gobolka oo qaarkood ka hor imaan doonaan sida muuqata
nidaamka 4.5 in wax lagu qeybsado.
Hadaba
qaabkee wax u rabaan Beelaha kasoo horjeeda Nidaamka 4.5 ee
ay ku dhisantahay Dowladda Federaalka Soomaaliya.
BEESHA MUDULLOOD.
Beeshan oo
ka mid ah beelaha waa weyn ee Hawiye inta badan waxau is
xijisaa lahaanshaha dhulka baaxada weyn ee ka kooban yahay
Gobolka Banaadir waxayna doonaysaa in ay isku hesho
Guddoomiyaha Gobolka Banaadir iyo Duqa Muqdisho lagamana
yaabo sida ay yiraahdeen odayaasha beeshaas inay ku qancaan
wax ka yar Labadaas jago inay ka helaan maamulka, oo noqon
doontaa su'aasha adag ee soo wajihi doonto taageerada
Ra'iisal Wasaare Nuur Cadde oo isagu beeshaas ka dhashay
balse haddii labadaas jago beesha weyso waxaa meesha ka
bixidoonta taageerada ay beesha u hayso Ra'iisal Wasaare
Nuur Cadde.
H/GIDIR
Dad badan
ayaa qaba in beesha H/gidir ay horseed u tahay kacdoonka
siyaasadeed ee lagaga soo horjeedo siyaasadda Madaxweyne C/llaahi
Yuusuf, dad kale ayaa aaminsan haddii aysan beeshan awoodo
badan ku yeelan dhismaha gobolka Banaadir ama aysan helin
duqa Muqdisho ama Guddoomiyaha Golaha degaanka wixii la
dhiso ay noqon doonaan hal bacaad lagu lisay.
MURURSADE
Ka sokow
beesha mudullood beeshan murusade waxay qabtaa in ay tahay
beesha labaad ee lagu tixgeliyo gobolka Banaadir ay tahay,
sidaas darteed kaalinta Beeshan Dhismaha Maamulka Gobolka
Banaadir waa mid cad, waxay doonayaan in haddii Mudulood
qaataan Guddoomiyaha Gobolka Banaadir,H/gidirna hesho
Guddoomiyaha Golaha deegaanka iyadana ay u baahan tahay inay
hesho Duqa Magaalada Muqdisho, waa qorshe ah 3-da jago oo
ugu sareysa Maamulka Gobolka aan wada qaadano sadexdeena
beelood.
BEESHA REER XAMAR
Waa iska
cadahay in beeshan ay tahay beel nabadeed oo aan wax lug ah
ku lahayn dagaaladii dalka ka dhacay iyo nidaam la'aanta ka
jirta Caasimadda dalka, sidaas darteed beeshan xaq weyn ayay
ku leedahay maamul kasta oo Gobolka Banaadir loo dhisayo,
waana in lagu tixgeliyaa awoodaha sare ee Maamulka ama
xubnaha ugu waa weyn.
HAWIYAHA INTIISA KALE
Ma cada
kaalinta ay ku yeelan doonaan dhismaha Gobolka Banaadir
Hawiyaha intiisa kale waxaaba dhici karta in tiro yar oo
xubno ah ka helaan Maamulka sida xubnaha golaha degaanka oo
kale, kumaba jiraanba orodka ay ku wada jiraan beelaha
Abgaal, H/gidir iyo Murusade, waase dhici kartaa in ay wax
is bedelaan.
BEESHA
DAAROOD
Ugu
yaraan beeshan Maamulka Gobolka banaadir waxay ka heli
doontaa sida uu qorshuhu yahay kuxigeenada Guddoomiyaha
Gobolka ama kuxigeenada Duqa magaalada iyo xubnaha Golaha
degaanka, waayo maamulkii hada la kala diray waxay ku
lahaayeen mid ka mid ah kuxigeenada Maxamed Dheere oo lagu
magacaabi jiray Cabdi Xaashi Liibaan oo beesha Daarood ka
dhashay.
www.ceegaag.com
webmaster@ceegaag.com |
