Ra'iiisul
Wasaaraha oo la Kulmay Ra’iisul Wasaarihii Hore
ee Norway iyo Mas’uuliyiin kale, soona booqday
Xarunta Biladaha Nabadda”
Ra’iisul Wasaaraha Soomaaliya Prof Abdiweli
Mohamed Ali oo weli booqasho rasmi ah ku jooga
Norway ayaa maanta waxaa kulamo la yeeshay
Ra’iisul Wasaarihii hore ee Norway Mr Bondivik,
Guddiga Ganacsatada Maraakiibta Norway, iyo
Safiirka Mareykanka ee Norway. Sidoo kale Ra’iisul
Wasaaraha iyo wafdigiisa waxey soo kormeereen
Xarunta Nabadda ee lagu bixiyo biladaha caalamiga
ee loo yaqaano “Nobel Peace Prize Centre”.
Kulankii Ra’iisul Wasaarihii hore ee Mr
Bondevik ayaa waxaa goob joog ka ahaa Ra’iisul
Wasaare Ku xigeenka ahna Wasiirka Ganacsiga &
Warshadaha Abdiwahab Ugas, Safiirka Midowga Yurub
Nur Adde iyo mas’uuliyiin kale. Labada mas’uul
ayaa waxey ka wada hadleen sidii Mr Bondevik iyo
Xaruntiisa Nabadda ee Oslo ay kaalin mug leh uga
qaadan laheyd dib u dhiska hay’adaha dowliga ah
iyo arrimaha nabadeynta. Mr Bondevik ayaa ku
ammaanay Ra’iisul Wasaaraha Soomaaliya horumarka
baaxadda leh ee laga sameeyey dhanka siyaasadda,
amniga iyo horumarka ballaaran ee dhaqangelinta
Roadmapka.
Ra’iisul Wasaaraha iyo wafdigiisa waxey
booqdeen Xarunta Biladaha Nabadda (Nobel Peace
Prize Centre) ee dalka Norway oo caan ku ah
bixinta biladaha nabadda.
Ra’iisul Wasaaraha Soomaaliya ayaa ka dib kulan
dheer oo qado sharaf ah la qaatay Guddiga
Milkiilayaasha Maraakiibta Norway oo ay ka wada
hadleen sidii xal waara loogu heli lahaa arrimaha
burcad-badeeda. Waxaana la isku raacay in xalka uu
ku jiro in Dowladda Soomaaliya lagala shaqeeyo
sidii ay amniga iyo kala danbeynta u soo celin
laheyd oo loo dhisi lahaa hay’adaha amniga iyo in
dhalinyarada Soomaaliyeed loo abuuro mashaariic
shaqo si ay bulshada wax u taraan.
Ra’iisul Wasaaraha ayaa kulan kale la qaatay
Safiirka Mareynkanka u fadhiya Norway oo ay ka
wada hadleen shirkii London iyo sidii Mareykanka
iyo Soomaaliya uga wada shaqeyn lahaayeen
dhameystirka marxaladda kala guurka ah.
Ra’iisul Wasaaraha ayaa lagu wadaa inuu caawa
kulan la qaato jaaliyadda Soomaaliyeed ee Norway
oo xaflad heer sare ah u qaban qaabiyey Ra’iisul
Wasaaraha oo ay ku soo dhoweynayaan.
