Mu'asasadda Al-Naciim oo
deeq gaarsiisay Barakacayaasha ku nool Kaamka Raydabo ee
Magaalada Muqdisho
(Muqdisho, Dec
20,
2011 Ceegaag Online)
Mu'asasadda Al-Naciim oo ka mid ah hay'adaha samofalka ah ee
ka shaqeeya gudaha dalka Soomaaliya ayaa u qaybiyay 600 qoys
oo ku nool kaamka Raydabo oo ku yaalla magaalada Muqdisho
gargaar raashin ah. Gargaarkan oo isugu jiray: masago, bur,
sokor iyo saliid ayaa waxaa qoys walba la siiyay: 50-kg oo
masago ah, 25-kg oo bur ah, laba caag oo saliid ah iyo 10-kg
oo sokor ah.
"Deeqdan
waxaa iska kaashaday mu'asasadda Al-naciim iyo hay'adda WAMY,"
ayuu yiri madaxa Al-Naciim, Yuusuf Xaaji Xuseen. Wuxuu
intaas ku daray in dadka ay gargaarka u qaybiyeen ay
ahaayeen kuwo dhibaateysan. "Barakacayaasha aan gargaarka u
qaybinnay waxay ahaayeen kuwo aan helin wax gargaar ah
muddooyinka, aad ayayna ugu farxeen gargaarkii aan u
qaybinnay," ayuu mar kale yiri madaxa mu'asasadda Al-Naciim.
Haweeney 90-jir ah oo ka mid ahayd qoysaskii gargaarka loo
qaybiyay ayaa tiri: "Gargaarkan waxaa nala soo gaarsiisay
xilli aan baahi weyn u qabnay, waanan uga mahadcelinaynaa
hay'adaha iska kaashaday inay nasoo gaarsiiyaan deeqdan."
Mu'asasadda Al-Naciim ayaa muddo ka shaqeynaysay howlaha
gargaarka bani'aadamnimo, waxayna gargaarro hore ka qaybisay
gobollada dalka qaarkood iyo kaamamka ku yaalla magaalada
Muqdisho ee ay ku jiraanas barakacayaasha abaaraha.
Gargaarradii ay horay u bixisay hay'adda ayaa waxay isugu
jireen raashin, dawo, teendhooyin, biyo, dhar iyo lacag
caddaan ah, kuwaasoo qaarkood ay iyada bixisay halka kuwo
kalena ay la kaashatay hay'ado caalami ah. Ugu dambeyn,
madaxa Al-naciim, Yuusuf Xaaji ayaa sheegay inay dhawaan ka
qaybin doonaan kaamamka ku yaalla kaamamka Muqdisho iyo
gobollada dalka qaarkood gargaarro kala duwan.
