|
Wasiirada Warfaafinta ee Dawlada Somalia iyo Maamulka
Puntland oo Soo saaray Qodobo ay Ku heshiiyeen oo Dhinaca
saxaafada ah.
(Muqdisho,
September 19,
2010 Ceegaag Online)
Wasiirka
Warfaafinta ee Xukuumada Federaalka KMG ah Eng. C/raxmaan
Cumar Cusmaan iyo Wasiirka Warfaafinta Isgaadhsiinta iyo
Hidaha iyo Dhaqan ee Maamulka puntland Cabdi Xakiim Axmed
Guuleed ayaa Magaalada Muqdisho ka Soo saaray Qodobo ay ku
Heshiiyeen kadib Markii Labada Wasiir kulan ku yeesheen
Magaalada Muqdisho ee Caasimada Wadanka Somalia, kulankaasi
oo lagu Casuumay Wasiirka Warfaafinta ee Puntland looga
hadlayey tayeynta Saxaafada Somalia iyo soo Celinta ha’yada
Warbaahinta Somalia.
Qodobada ay ku heshiiyeen labada dhinac oo saxaafada loo
qaybiyay ayaa u qornaa sidan:
1. In laga shaqeeyo horumarinta warbaahinta Soomaaliya, lana
dhowro madaxbannaanida, daacadnimada, run-sheegga iyo
dhexdhexaadnimada warbaahinta Soomaaliya. Suxufiyiintana waa
inay u hoggaansamaan shuruucda dalka iyo kuwa caalamigaba
iyagoo dhowraya anshaxa iyo asluubta saxaafadda.
2. In Puntland laga caawiyo sidii ay u dhisan lahayd awood
warbaahineed oo ay ku jiraan raadiyeyaal FM ah si sare loogu
qaado wacyigelinta dadweynaha, isla markaana gacan looga
geysto sidii loola dagaallami lahaa dhaqanka ku dhisan qaska
ee Soomaaliya loo soo waariday.
3. In wasaaradaha warfaafinta ee Xukuumadda KMG ah iyo
Puntland ay helaan qaab wadashaqeyn dhameystiran.
4. In la sameeyo hab mideysan oo dhammaan warbaahinta
soomaaliyeed lagu diiwangeliyo, laguna siiyo ruqsada
howlgalka ee heer Qaran.
5. In la dhiso awoodda weriyeyaasha soomaaliyeed. Sidaasi
darteed waxaa qorsheyaal taabagal ah loo dajin doonaa sidii
Puntland looga furi lahaa machad lagu barto saxaafadda, si
loo soo saaro saxafiyiin xirfad leh oo mas’uul ah.
6. In dib loo soo nooleeyo Wakaaladdii Wararka Qaranka
Soomaaliyeed (SONNA), taasoo soo uruurin doonta, isla
markaana faafin doonta wararka Soomaaliya oo dhan.
7. In la qabanqaabiyo isweydaarsi saxafiyiinta si ay isku
dhaafsadaan cilmi iyo waayoaragnimo.
8. In la dhiso xiriir wanaagsan oo dhexmara Xukuumadda KMG
iyo Puntland, gaar ahaan dhinacyada muhiimka u ah labada
dhinacba.
www.ceegaag.com
webmaster@ceegaag.com |
